فانتازيا الحل!

التربية هى الحل

  على الرغم من أن طريقها طويل ومعقد ومتشابك إلا إنك هتلاقى نفسك قصاد حيطة سد أو هتلف وتلف وترجع برضه للتربية كحل لكل مشاكلنا التى تبدو أنها أزلية تنمو معنا ولاتشيخ أبداً ولا تنتهى بموتنا!

  حل لمشكلة كبرى وهى الزواج والأسر المفككة، هذا رغم أنه يبدو أن الناس سعيدة وبتجوز كل يوم وعمالة تزرط بالسبعة وعشرين عيل كل ثانية. إلا إن عين العبد لله مبترصدش غير المناظر الوحشة... مثلاً خد عندك فى مدرستين شهدت لباسة القلم الفرنساوى استخداماً لم تعهده من قبل، لقد استخدمها الصبيان فى تشويه بعضهما فأحدهما شرم خد صديقه وآخر غرزها فى رقبة أحدهم! لاتنكر عزيزى القارئ هذه استخدامات إبداعية، أرجوك من فضلك بص لجزء الكوباية المليان!

  وبناءً على هذا جاء فى عقلى حل قد يكون مكرراً، ولكن لم لا أنثره أمامك:

• الاكتفاء بالمرحلة الثانوية  كمرحلة مؤهلة لسوق العمل، هذا يجعل الإقبال يزداد على المدارس الفنية كالزراعة والتجارة والصناعة. ومن يرغب فى دخول الجامعة لابد من شروط عقلية قاسية.
• التشجيع على الزواج المبكر 16 عاماً، الإنجاب من سن 18 سنة، اللى يخلف أكثر من ثلاثة يحرم من خدمات الدولة.
• إلغاء التجنيد وجعل الجيش محترف بمرتبات عالية لمن يرغب فى الالتحاق به، وتظل الكليات العسكرية كما هى.
• على الدولة أن تعطى لكل مواطن مساحة من الأرض الفضاء الفراغ لينفذ مشروعه، على أن تكون كاملة الخدمات أو حتى مش كاملة!
• تصفية وزارة التربية والتعليم سواء إداريين أو معلمين -معرفش هتتعمل إزاى غير بقنبلة نووية- وأولهم أنا وبالمرة يشوفولنا شغلانة تانية!

  عزيزى القارئ ما تشتمشى عشان الاقتراح مش هيتنفذ ولا أى اقتراح تانى، عشان احنا بيحكمنا شوية ناس ولامؤخذة بنت ستين كلب ميهماش إلا زكايبها تتعبى فلوس. لذلك احنا ناخد بعض كمدونين واعيين ونطير على كوكب تانى قريب!

  بالأخيير أحب أسأل سؤال مالوش أى علاقة بشوية الهبل اللى فاتو "هى جوجل هتدينا جائزة على تنشيط البلوجر وإنقاذها من الضياع؟!"