بص فى ورقتك
- كل ما أخش لجنة أفتكر نفسى وأنا بامتحن... أه أنا كنت بغش، بس مكنتش بغش بالغباء ده ولا كنت تنح ولا بجح ولا رخم!
- أوسخ مادتين كنت دايما بتذنق فيهم، الإنجليزى والرياضة.. أنا لغاية دلوقتى معرفش 1+1 بيساوى كام!
- بما انى جبت سيرة الرياضة وفشلى فيها، أحب أمدح فى نفسى وأقول إنى كنت شاطر فى الهندسة وحساب المثلثات إزاى معرفش... صعوبات تعلم!
- أفضل المراقبين هو اللى ممكن يديك فرصة مرة واتنين وثلاثة، أو لما يلاقيك مذنوق يفك عنك. إنما متلاقيش فى لجنته لا صوت ولا حركة ولا واحد مطلع برشام، ده كدة مراقب محترم!
- أغبى حاجة لما يخش معاك مدرس شحط محط، غير متزن نفسيًا ولا سلوكيًا. عامل فيها سبع يهيجلك اللجنة كلها، ساعتها بقى يشربها هو لوحده... الصراحة ببقى عايز أولع فيه!
- إنما دلوقتى هااا ابقى قابلنى، ده بيكسلوا يعملو البرشام ويغش من زميله أسهل وأسرع. ده لو افترضنا إنه بيسمع أو بيعرف يكتب أساسًا!
إنت وحظك!
- يا سلام بقى لو كنت فالح كدة وتجرب مثلًا إللى بتعمله فى ثانوى عام على ثانوى فنى.... لو مدرسة ولاد هيتعلم عليك، لو بنات لبسة مصيبة!
- هههه مرة سألت واحد فى مدرسة تجارية كنت بتمتحن إيه؟ قعد يبصلى فى السما وقالى باين مواد قانونية، ده طبعًا بعد إيهات* لا تعد ولا تحصى!
- ولا مثلًا كنت بتراقب فى الثانوية العامة، ورحت مدرسة فى محافظة تعبانة فى مكان زبالة.. وعملت نفسك بارم ديله ومسكت اللجنة، هيستنوك برة المدرسة العيلة وعيلت العيلة! وانت وحظك بقى حد لحقك من أهل البلد... عرفت تجرى، إنت وحظك!
- أنا إيه اللى شغلنى الشغلانة دى؟! والله أنا قلت أنا وحظى! والحمد لله لغاية دلوقتى أنا بتفرج وبسمع وبضحكلى شوية، أهو بدل قعدة البيت!
* إيهات دى جمع إيه!
يعني عليك يا ضنايا معلش معلش
ردحذفعارف في شغلي السابق هو معهد تعليمي بيدي شهادة بكالوريوس ان حد يتجرء ويقولي اطلعي راقبي دي معناها انه قرر يقتل نفسه لاني بكل هدوء يا هقتله يا هقتل نفسي بس مش مراقبة انا حلوة دي والحمد لله كانوا عارفين اني مجنونه وعصبية واقنعتهم ان طبيعة شغلي لا تسمح بصعودي للجان هنهرج احنا ولا اية
ربنا معاك يخويا شد حيلك كلها لها بقى :)
الي يعيش ياما يشوف
ردحذف